Gjøa
Utbygging:
Gjøa ligg om lag 40 kilometer nord for Framfeltet, på 360 meters havdjup. Statoil er operatør i utbyggingsfasen, medan GDF SUEZ E&P Norge skal overta operatøransvaret når feltet kjem i produksjon. Utbygginga omfattar fem havbotnrammer knytt til ei halvt nedsenkbar produksjons- og prosessinnretning. Gjøa-innretninga vil få kraftforsyning frå land.
Reservoar:
Reservoaret inneheld gass over ei relativt tynn oljesone i sandstein tilhøyrande Viking-, Brent- og Dunlingruppene av jura alder. Reservoaret er i fleire skråstilte forkastingssegment med delvis usikker kommunikasjon og vekslande reservoarkvalitet. Reservoaret ligg på om lag 2 200 meters djup.
Utvinningsstrategi:
Gjøa vil bli produsert ved naturleg trykkavlasting.
Transport:
Stabil olje vil bli eksportert i ein ny 55 kilometer lang rørleidning som skal koplast til Troll Oljerør II, for vidare transport til Mongstad. Rikgassen er planlagt eksportert i ein ny 130 kilometer lang rørleidning til Far North Liquids and Associated Gas System (FLAGS) transportsystem på britisk kontinentalsokkel, for vidare transport til St. Fergus.
Status:
Gjøa-innretninga er no på plass på feltet og produksjonen er venta å starte hausten 2010.
Goliat
Utbygging:
Goliat er eit oljefelt som blei påvist i år 2000 og ligg om lag 50 kilometer søraust for Snøhvitfeltet i Barentshavet. Havdjupet i området er 360 – 420 meter. Goliatfeltet vil bli bygd ut med åtte havbotnrammer med totalt 32 brønnslisser. Desse vil bli knytt til ei sirkulær, fast forankra og flytande produksjonsinnretning med integrerte lager- og lastesystem.
Reservoar:
Reservoara er i sandstein av trias alder. Olje og ei tynn gasskappe finst i Kapp Toscanagruppen, og i Kobbeformasjonen. Reservoara ligg om lag 1 100 meter under havflata, og er av varierande kvalitet.
Utvinningsstrategi:
Goliat vil bli produsert ved hjelp av vassinjeksjon. I første omgang vil assosiert gass bli injisert i påvente av ein mogleg gasseksport gjennom Snøhvit gassrør til Melkøya.
Transport:
Oljen vil bli lasta på tankskip og transportert til marknaden. Mogleg gasseksport til Melkøya vil bli utreda.
Status:
Planlagt produksjonsstart er i 2013.
Morvin
Utbygging:
Morvin ligg om lag 20 kilometer nord for Kristinfeltet og 15 kilometer vest for Åsgardfeltet. Havdjupet er om lag 350 meter. Feltet blir bygt ut med to havbotnrammer knytte til Åsgard B.
Reservoar:
Reservoaret inneheld olje og gass i ein rotert og skråstilt forkastingsblokk på 4 500 – 4 700 meters djup, og er i sandstein tilhøyrande Garn- og Ileformasjonane av mellomjura alder. Reservoaret i Garnformasjonen har relativt homogene avsetjingar, medan reservoaret i Ileformasjonen er meir heterogent.
Utvinningsstrategi:
Morvin vil bli produsert ved trykkavlasting.
Transport:
Brønnstraumen frå Morvin vil gå i ein 20 kilometer lang rørleidning til Åsgard B for prosessering og vidare transport.
Status:
Produksjonsstart er planlagt hausten 2010.
Oselvar
Utbygging:
Oselvar ligg i den sørlege delen av Nordsjøen, 21 kilometer sørvest for Ulafeltet. Havdjupet i området er om lag 70 meter. Utbyggingsløysinga er ei havbotnutbygging med produksjonsbrønnar knytt via rørleidning til Ulafeltet.
Reservoar:
Reservoaret ligg på 2 900 – 3 250 meters djup i sandstein tilhørande Fortiesformasjonen av paleocen alder. Reservoaret inneheld olje med ei overliggjande gasskappe.
Utvinningsstrategi:
Oselvar vil bli produsert ved naturleg trykkavlasting via horisontale produksjonsbrønnar.
Transport:
Brønnstraumen skal gå i ein rørleidning til Ulafeltet for prosessering. Gassen vil bli nytta som injeksjonsgass i Ula for auka utvinning, medan oljen vil bli transportert i rør til Ekofisk for vidare eksport.
Status:
Produksjonsstart er planlagt i slutten av 2011.
Skarv
Utbygging:
Skarv ligg om lag 35 kilometer sørvest for Nornefeltet i nordre del av Norskehavet. Utbygginga er ei samordning av førekomstane 6507/5-1 Skarv og 6507/3-3 Idun. Førekomsten 6507/5-3 Snadd inngår i Skarv, men er førebels ikkje ein del av utbygginga. Havdjupet i området er mellom 350 og 450 meter. Utbyggingsløysinga er ei flytande produksjonsinnretning (FPSO) knytt til fem brønnrammer på havbotnen.
Reservoar:
Reservoara i Skarv inneheld gass og kondensat i sandstein tilhøyrande Garn-, Ile- og Tiljeformasjonane av mellomjura og tidlegjura alder, ligg på 3 300 – 3 700 meters djup og er delt opp i fleire forkastingssegment. I Skarvførekomsten er det også ei underliggjande oljesone i Garn- og Tiljeformasjonane. Garnformasjonen har god reservoarkvalitet, medan Tiljeformasjonen har relativt dårleg kvalitet.
Utvinningsstrategi:
Dei første åra planlegg ein reinjeksjon av gass i Garn- og Tiljeformasjonane for å auke oljeutvinninga.
Transport:
Oljen vil bli bøyelasta til tankskip, medan gass vil bli eksportert via eit nytt rør på 80 kilometer som er knytt opp til Åsgard transportsystem.
Status:
Produksjonsskipet og brønnrammene er planlagt ferdige hausten 2010. Borestart vil bli i 2010, med planlagt produksjonsstart i 2011.
Vega
Utbygging:
Vega ligg rett nord for Framfeltet i den nordlege delen av Nordsjøen. Havdjupet er om lag 370 meter. Feltet omfattar to separate gass- og kondensatførekomstar; 35/8-1 og 35/8-2. Ein samla PUD for Vega og Vega Sør blei godkjent av styresmaktene i juni 2007. Feltet blir bygt ut med to havbotnrammer knytt til prosessinnretninga på Gjøafeltet.
Reservoar:
Reservoara er i sandstein tilhøyrande Brentgruppa av mellomjura alder, og ligg på om lag 3 500 meter. Dei har høg temperatur, høgt trykk og relativt låg permeabilitet.
Utvinningsstrategi:
Feltet vil bli produsert med trykkavlasting.
Transport:
Brønnstraumen vil bli sendt i ein rørleidning til Gjøa for prosessering. Olje og kondensat vil bli sendt derifrå i ein ny rørleidning kopla til Troll Oljerør II for vidare transport til Mongstad. Rikgassen vil bli eksportert i ny rørleidning til Far North Liquids and Associated Gas System (FLAGS) på britisk kontinentalsokkel for vidare transport til St. Fergus.
Status:
Produksjonen er venta å starte hausten 2010.
Vega Sør
Utbygging:
Vega Sør ligg ved Framfeltet og havdjupet er om lag 370 meter. Ein samla PUD for Vega og Vega Sør blei godkjent av styresmaktene i juni 2007. Utbyggingsløysinga er ei havbotnramme knytt saman med Vega. PUD-fritak for oljesona blei godkjent hausten 2009.
Reservoar:
Reservoaret inneheld gass og kondensat med ei oljesone i øvre del av Brentgruppa av mellomjura alder, og ligg på om lag 3 500 meters djup.
Utvinningsstrategi:
Feltet vil bli produsert med trykkavlasting.
Transport:
Brønnstraumen vil bli sendt i ein rørleidning frå Vega Sør via havbotnrammene på Vega til Gjøa for prosessering. Olje og kondensat vil bli sendt derifrå i ein ny rørleidning kopla til Troll Oljerør II for vidare transport til Mongstad. Rikgassen vil bli eksportert i ny rørleidning til Far North Liquids and Associated Gas System (FLAGS) på britisk kontinentalsokkel for vidare transport til St. Fergus.
Status:
Produksjonen er venta å starte hausten 2010.
Yme
Utbygging:
Yme ligg i den søraustlege delen av Nordsjøen på 77 – 93 meters havdjup. Yme er det første oljefeltet på norsk sokkel som blir bygt ut på ny etter at feltet har vore stengt ned. Feltet blei første gong bygt ut i 1995, innafor utvinningsløyve 114 med Statoil som operatør. Produksjonsperioden var frå 1996 til 2001, då det ikkje lenger blei funne lønsamt å halde fram med drifta. Nye rettshavarar i utvinningsløyve 316 med Talisman som operatør, vedtok i 2006 å utvinne attverande ressursar med ei ny oppjekkbar produksjonsinnretning. Denne er plassert på ein lagertank for olje på havbotnen over Gamma-strukturen. Beta-strukturen blir bygt ut med brønnar på havbotnen.
Reservoar:
Yme inneheld to separate hovudstrukturar; Gamma og Beta, med til saman fem førekomstar. Reservoaret er i sandstein tilhøyrande Sandnesformasjonen av mellomjura alder og ligg på om lag 3 150 meters djup.
Utvinningsstrategi:
Yme vil hovudsakleg bli produsert med vassinjeksjon som drivmekanisme. Overskotsgass kan òg bli injisert saman med vatn i ein brønn.
Transport:
Brønnstraumen vil bli prosessert på Yme-innretninga og oljen vil bli lagra i tanken for eksport via lastebøyer til tankskip. Overskottsgassen er planlagt injisert.
Status:
Produksjonsstart er planlagt hausten 2010.
|